沙田1名大叔涉嫌違法在頗多學生經過的行人路騎單車，差點撞到年輕男子，並與對方激撻爆笑舌戰！該名無品叔不但多次辱罵後輩，又挑機對方「𡁻我囉！wee wee wet wet！」Channel C其後直擊到不少叔嬸均在上述行人路騎單車，更在人群中穿插，有機會傷及途人。
「差啲撞到人 仲要啤住」
在行人路非法騎單車引致的安全問題，並非杞人憂天；翻查資料，2010年大埔已有中年婦在行人路被單車撞死。讀者阿M向Channel C報料指，2024年3月5日下午約5時許，在沙田IVE後門與朋友遇上1位阿叔。對方在非單車徑踩單車。更差點撞倒他們，雙方爆發口角。
阿M當時與朋友在沙田IVE放學，從後門離開時差點被1名踩單車的阿叔撞倒。「佢揸住架單車，叫我哋走開，佢差啲撞到人，仲要啤住我個朋友，咁我個朋友就同阿叔講『差啲撞到我』，阿叔就開始嘈。」阿M表示恐防會發生肢體碰撞，所以開始拍片。
「如隨地便溺 仲理所當然」
片中見到單車阿叔與阿M的朋友舌戰。阿M指阿叔在差點撞倒人的情況下並未有道歉，更理直氣壯地指罵人。「你睇條片，都見到佢最後係踩單車落去無障礙通道設施。個設施好明顯係畀有障礙嘅人士，可能係輪椅使用。佢覺得嗰個行人位置係應該踩單車嘅，佢覺得無問題。」
阿M重申事發地點非單車徑，而是學校門口。「我覺得好唔文明，佢喺唔係單車徑嘅地方使用單車，但覺得理所當然；就正如啲人隨地大小便，但覺得理所當然。」阿M與朋友當時未能阻撓阿叔離開，其後憑拍攝的影片，到警署報案。惟警方指沒有阿叔的聯絡方法，難以受理。
「成日差啲俾佢哋撞到」
Channel C記者去過案發現場視察，發現的確有不少人涉嫌違法在上述行人路踩單車，更在人群之間穿插，主要是阿叔阿嬸；亦有少年違規，但只佔少數。原來此舉或已觸犯《簡易程序治罪條例》 ，萬一罪成，最高罰款500元或監禁3個月。其實同學上學下課，經常要避開校園外駛過的單車，的確有機會與單車友踫撞。
郭同學接受Channel C訪問時指，校門外的路非單車徑，但「有好多工人姐姐都會接小朋友放學，都會踩單車；又有啲人買餸都會踩單車，成日差啲俾佢哋撞到」。鍾同學亦指，上述路面不算闊，若有人踩單車會變得擠迫，覺得危險。蘇同學都表示，曾差點被單車撞到，希望踩單車的人更多留意路上行人。
