嚟到周末一齊笑一笑！今個星期有位工人姐姐喺網絡爆紅，佢自拍咗一段短片，用唔鹹唔淡嘅廣東話，以及囂張嘅態度訓示咗老細一番，雖然有僱主話「邊個請着佢都慘」，但另一邊相網民就力讚「講咗香港打工仔心聲」。
周一（14日）有人喺fb「香港外傭僱主分享」群組上載短片，一位工人姐姐自拍，邊食嘢邊寸爆僱主話：「你有錢大晒呀？你依家試下請工人？請得到咩？」又話工人都係人，「唔係地下人呀」，又呻攰，「你估我都唔攰呀？我都攰呀幫你做！你畀錢幾多姐？4千幾吓嘛？」短片最搞笑係工人姐姐嘅語氣，而且好似真係有傾訴對象咁，會反問「你知唔知呀？」、「你話吖！」、「仲講？」等，以為佢傾緊視像電話，但之後會自問自答。
點解呢位工人姐姐要拍呢段片就未知，但片段公開後有作為僱主嘅網民就留言話，「邊個請著佢激死咗都彈返起身」、「咁巴閉唔好撈囉」、「博炒」，亦有網民笑指工人姐姐好似拍緊劇，「係咪睇大台啲劇多，啲口吻咁似」，仲讚「有潛質做戲劇中惡毒工人姐姐」。
