講你都唔信，「 喱騷 」話咁快就一周年台慶啦！！整咗咁多精彩節目，緊係搞返個台慶頒獎禮賀賀佢啦～ 杜汶澤嗰晚仲化身豬肉切割員，以「閉門式分豬肉」為主題，頒咗三個足金獎座，表揚頭三個全年最高點擊率節目。如果想睇足本台慶頒獎禮，20號喺喱騷社交平台就有得睇啦！
點擊率第三名係哩騷首部自家製劇集《在觀塘下體現愛的故事》，監製 田蕊妮 Kristal Tin喺台上分享得獎感言，未知是否興奮過度，阿田在台上竟然甩轆「講錯嘢」，明明排第三，又話話「很開心獲得第二位」，唔緊要啦，無拎錯人哋個獎咪OK囉～而首次執導劇集嘅導演林子穎，就多謝田蕊妮給予機會，「多謝台前幕後的用心，希望可以拍第二季。」
至於全年最高點擊率節目第二位，則由口碑極佳的《墨水漂流》奪得，仲邀請到身上紋身堪稱全球最多的「外國人」頒畀兩位紋身師Jimmy同Cody，果然落重本啊！眾望所歸，第一位由杜汶澤和李拾壹主持的《尋找他媽的故事》勇奪，大會仲特登請埋重量級嘉賓、電視界史上最偉大巨人153嚟頒獎，不過牛高馬大嘅阿澤就要用放大鏡輔助先可以喺153手中拎個奬座。阿澤仲不畏言咁講，「其實當初拍這個節目的目的，是可以周圍呃飲呃食，希望大家可以繼續課金支持喱騷。」
第一年台慶就咁精彩，2022年又點輸得呀～台慶鉅獻清談節目《杜氏閒情》，將會喺12月20日隆重首播，係阿澤同田蕊妮兩公婆結婚15年首次合體拍節目呀！今次兩公婆為咗《杜氏閒情》首度合體，將「家事」搬上電視，除咗喺螢幕面前打情罵俏，互揭對方家中真面目，亦都會解答網民生活上疑難雜症，李拾壹更會在節目中做和事佬（aka架兩），諗起都覺得有趣～
李拾壹除咗做和事佬，仲會犧牲埋自己，男扮女裝拍住阿澤一齊推出《為何Mimi總是餓》，化身由洛杉磯回流的Mimi，陪杜汶澤炒蝦拆蟹。佢哋除咗喺廚房鬥嘴，還會一路向台南出發，拍攝《尋找他媽的故事2之山水有雙雄》，尋覓「台南」同鄉。近年港人移民潮重現，不少港人紛紛移居英國，2022年杜汶澤將會遠赴英國，聯同YouTuber混血肥仔拍攝全新節目《尋找他媽的英國》，發掘當地港人的生活。
如果你鍾意睇真人騷，2月就更加唔可以錯過dating真人騷《好想大聲說愛你》啦！節目搵嚟四男四女參賽者於西貢三層公寓展開浪漫旅程，參賽者每晚還要輪流與唔同異性「上床」，到底可否搵到真愛？人美心善嘅Reneebobo Li 李蔓瑩 更加會喺一系列飲食節目到打響頭炮，帶大家食西班牙菜。
嚟到最尾，畀你估到個個仲叫阿澤嘅？除咗電視節目，「喱騷」出年更加會殺入大銀幕，投資拍攝一部純香港本土電影以及一部台港合拍片添！如果想支持「喱騷」，年費港幣$800，就可以成為VIP用戶，睇晒「喱騷」所有精彩節目㗎啦～
