曾傲棐（Arvin）推出今年派台歌，首次與偶像恭碩良（Jun）合作。Arvin大讚Jun的作品很有溫度、感染力。他又透露認識阿Jun的第一隻作品是《你着幾號鞋》，Arvin笑言初次到錄音室見Jun時因換拖鞋，對方有意無意第一句問他：「你着幾號鞋？」
曾傲棐今年首支歌曲《時間的碎片》昨日（3月31日）上架，這次找來全新音樂班底合作，歌曲由徐繼宗作曲，小克填詞，探索他熟悉的因果循環和時間觀，編曲方面亦首度與偶像恭碩良（Jun）和蘇道哲合作，Arvin更力邀Jun擔任歌曲監製。
經歷去年的新人年後，Arvin的新歌以成長為題，是他腦中發酵已久的想法：「係中五、六時嘅idea，成日都聽人講『早知乜乜乜啦』、『如果可以重新嚟過我一定會點點點』，但我覺得就算俾你重新嚟過，以你當時嘅思想、經驗，其實已經係做咗最好嘅選擇。與其不停咁返過去，不如放眼未來。有啲控制唔到嘅嘢就由佢啦，盡人事聽天命就係咁解，所以我將呢個idea講咗俾小克聽，佢就幫我寫咗呢份詞。」
歌曲講述成長，Arvin在這首歌中亦成就解鎖，邀得偶像恭碩良（Jun）合作。他直言對Jun的第一印象並非因為打鼓，而是從幕後製作開始：「細個鍾意Eason、阿Paul黃貫中，好多好鍾意嘅作品嘅製作，好多時都會見到Jun嘅名，呢個就係我對佢嘅第一個印象，之後先係打鼓。我記得係2010年Eason Duo嗰個演唱會隻碟，佢打得好有感染力，見到佢打鼓enjoy個表情、個律動，令到我更加投入去聽隻歌。」Arvin表示Jun的作品很有溫度、感染力，很希望做出感染人的作品，於是膽粗粗邀請Jun合作。
Arvin坦言跟自己偶像合作，是一件很神奇的事，他曾想像過「藝人」是否表裏不一？但Jun跟他看到的：「好玩得，同佢做嘢冇乜壓力，因為佢真係一個好叻嘅人，諗到啲咩idea同佢講，佢就會試、就會做出嚟。」跟Jun的首次見面，亦令Arvin十分難忘：「我諗好多人認識阿Jun嘅第一隻作品就係《你着幾號鞋》，我同Jun喺Studio第一次見面，佢同我講嘅第一句嘢，唔知有心定無意，好好笑，因為我哋入去室內要除鞋換拖鞋，打開門佢就叫我：『喂！Arvin，你着幾號鞋㗎 ？』我已經笑到黐咗線，哈哈，呢個就係我哋之間嘅第一個conversation。」隨後他又分享跟Jun創作歌曲點滴：「有陣時一啲靈感都冇，我記得Jun同我講：『要enjoy呢個好lost嘅moment，因為呢個你唔知點算好嘅moment就係呢隻歌最後出到嚟好神奇嗰個vibe嘅來源，你唔使驚，冇就冇啦，冇就落去食飯啦。』所以我哋係咁食飯嘅，哈哈！日日都係去同一間茶餐廳食晒晏晝、夜晚，但係幾好玩幾好笑，我從來都未試過有咁樣嘅writing camp嘅體驗。」
