MIRROR首個紅館演唱會門票無論係最早輪優先預訂，抑或日前實名制公開發售，都令鏡粉、前夫們花盡心力去撲飛，但結果唔少人都失望而回。直至昨日（2日）香港電訊繼FWD富衞保險後，又宣佈推出MIRROR演唱會門票抽獎，未買到飛嘅鏡粉諗住有最後抽獎機會之際，但原來抽中咗要喺指定期限內買兩項月費計劃，兼預繳24個月，即係又課金5位數字先有演唱會飛兩張，唔少鏡粉都鬧爆「貪得無厭」，形容係「最大黃牛」。
【新聞有價 記者有格 立即訂閱：https://bit.ly/3wGQh7c】
連成立近一年、至今擁有逾35萬成員嘅facebook群組「我老婆嫁左比Mirror導致婚姻破裂關注組」，昨晚都宣佈將於MIRROR演唱會後永久關閉。谷主喺帖文提到對MIRROR演唱會安排極度不滿：「MIRROR賣廣告，鏡粉衝住買晒佢。有MIRROR卡抽，鏡粉一日三餐食老麥。MIRROR出席活動，鏡粉早一日去排隊霸位。MIRROR出新MV，鏡粉人肉loop到幾百萬view唔知為乜。MIRROR出新歌，唔使你畀錢宣傳，佢哋自己出錢出力搞應援。」
谷主都話預咗MIRROR首個紅館演唱會難買飛，但無奈嘅係「一睇個floor plan，喂黑洞咁嘅樣嘅？比我嘅感覺係：你眠乾睡濕養大個仔，想參加佢嘅畢業典禮，但，你要睇下好唔好彩先買到飛。一係你就幫襯校長個fd買份保險，一係就係canteen買24個月餐券，想坐靚位？買兩set吖。你哋依家係將鏡粉對MIRROR嘅愛綁架，你當鏡粉係ATM係水魚。錢係要賺，但食相唔係咁難睇啩，各位演唱會嘅主辦單位，你哋係咪真係以為啲鏡粉個個都幾億身家？」
帖文po出已15個鐘，有近3萬人讚好，唔少人都留言話雖然唔捨得，但支持版主決定，「今次真係『焫焫焫焫焫焫著』一班忠心支持的鏡粉💔」、「演唱會應該係鏡粉與鏡仔共慶的日子，賺錢唔應該係呢日嚟賺囉！」亦有人認為「唔關12子事，但公司makerville絕對有責任，間接贊成贊助商當鏡粉係水魚，唔係個個粉都有多餘錢買多份保險，join多個plan或者一次過俾大嚿錢，想睇場演唱會啫，已經實名制都買唔到飛，心灰意冷！」、「希望上面啲人會因為你嘅舉動而反思，下個演唱會唔該鬆下手，希望嗰floor plan 唔好再係黑洞啦！」
