軒仔（張敬軒）推出了全新廣東歌《隱形遊樂場》，由他親自作曲，Wyman（黃偉文）填詞，繼上月遠赴英國倫敦開演唱會時率先現埸演唱，日前歌曲終於上架，更在各主要音樂串流平台登上第一位。週四（20日）軒仔於IG開Live時大談歌曲理念，「趕潮流嘅嘢唔難做，但係要做一啲嘢或者一首可以感動到自己嘅歌，我覺得會比較忠於自己。」以及感謝籌備MV製作團隊，「呢班香港嘅朋友真係冇問價錢、冇講過價錢，只要佢哋有時間，佢哋就嚟。呢種一呼百應嘅感覺係令到今日呢個mv可以成功online嘅原因，所以我想藉住呢個live，親口去多謝參與呢一個MV project嘅所有嘅朋友。好感恩喺生命當中遇到咁多叻嘅人、咁多勁嘅人幫手。」有各方好友仗義幫忙，鍾情舊物的軒仔更動手製作MV道具入面的控掣台，「要去好多古董舖搵，搵唔到嘅錶，其實有啲係指南針，其中一個係以前嘅電燈掣。」然後軒仔又為DSE考生們打氣、預告了將會三個版本的mv、及說十分期待星期日（23日）在觀塘apm舉行的簽唱會。直播除了吸引了過萬人一齊睇，身處日本的Wyman亦有收看及留言說自己去了富士山找黃色大門，十分疲累，指會相約軒仔過幾天一齊開live。
開Live尾聲時，甚少提及雙親的軒仔突然眼紅紅自爆，爸爸因Covid後遺症突然在家中昏迷，原來是軒仔爸爸媽媽於倫敦時確診了Covid，好彩是上機回港前檢測回復正常，軒仔原本決定拍完MV後回廣州看父母，媽媽卻突然說：「『而家過咗先話俾你聽啦，你老豆琴日差啲冇咗啦。』原來爸爸喺前一日，由於Covid嘅一啲後遺症，喺屋企突然間昏迷，嚇親我阿媽，好彩當晚爸爸後來醒番，又穩定番。」經過今次事件差點失去父親，軒仔終於說服到十年來一直拒絕搬到香港同住的爸爸，他說：「可以照顧到佢哋啦，唔駛做嘢時又可以返去食飯陪吓佢哋，有啲乜嘢都可以照顧得到，所以我好想同大家分享！我覺得喺一個屋企嚟講，照顧到佢哋，喺人生呢個階段係好重要。」
【新聞有價 記者有格 立即訂閱：https://bit.ly/3wGQh7c】
